wafa ki khair manata hun bewafai main bhi

وفا کی خیر مناتا ہوں بے وفائی میں بھی
میں اس کی قید میں ہوں قید سے رہائی میں بھی

لہو کی آگ میں جل بُجھ گئے بدن تو کھلا
رسائی میں بھی خسارہ ہے نارسائی میں بھی

بدلتے رہتے ہیں موسم، گزرتا رہتا ہے وقت
مگر یہ دل کہ وہیں کا وہیں جدائی میں بھی

لحاظ حرمتِ پیماں نہ پاس ہم خوابی
عجب طرح کے تصادم تھے آشنائی میں بھی

میں دس برس سے کسی خواب کے عذاب میں ہوں
وہی عذاب در آیا ہے اس دہائی میں بھی

تصادم دل و دنیا میں دل کی ہار کے بعد
حجاب آنے لگا ہے غزل سرائی میں بھی

میں جا رہا ہوں اب اس کی طرف اسی کی طرف
جو میرے ساتھ تھا میری شکستہ پائی میں بھی