Sukhan e haq ko fazelat nahi milny wali

سخن ِحق کو فضیلت نہیں ملنے والی
صبر پر دادِ شجاعت نہیں ملنے والی

وقتِ معلوم کی دہشت سے لرزتا ہوا دل
ڈوبا جاتا ہے کہ مہلت نہیں ملنے والی

زندگی نذر گزاری تو ملی چادر ِخاک
اس سے کم پر تو یہ نعمت نہیں ملنے والی

راس آنے لگی دنیا تو کہا دل نے کہ جا
اب تجھے درد کی دولت نہیں ملنے والی

ہوس لقمٔہ تر کھا گئی لہجے کا جلال
اب کسی حرف کو حرمت نہیں ملنے والی

گھر سے نکلے ہوئے بیٹوں کا مقدّر معلوم
ماں کے قدموں میں بھی جنّت نہیں ملنے والی

زندگی بھر کی کمائی یہی مصرعے دو چار
اس کمائی پہ تو عزت نہیں ملنے والی